Normes Ortográfiques, Gramática y Diccionariu normativos de l'Academia de la Llingua Asturiana (ALLA)

Atrás    PDF


La más importante de les finalidaes con trescendencia xurídico-público que l'Executivu-y encamentó a l'Academia de la Llingua Asturiana (ALLA) -Decretos 33/1980 y 9/1981 del Conseyu Rexonal d'Asturies-, ye la del so papel como Institución encargada de la normativización del idioma y l'afitamientu'l criteriu d'autoridá no que cinca al so usu.

Nel so estatutu (Decretu 9/1981, del Conseyu Rexonal d'Asturies, d'aprobación los Estatutos de l'ALLA y Acuerdu'l Conseyu Gobiernu'l Principáu, de 12 d'abril de 1995, de modificación los Estatutos de l'ALLA), l'Academia de la Llingua Asturiana tien encamentaes les funciones d'investigación y formulación de les lleis gramaticales de la llingua asturiana y de les sos variedaes llingüístiques (art. 1.a); dar orientaciones y normes pal so cultivu escritu y formal (art. 1.b) ya inventariar el so léxicu (art. 1.c); tamién, afitar el criteriu d'autoridá nes custiones cincantes a la normativa, actualización y usu correchu de la llingua asturiana (art. 1.j).

Nel desendolque d'esti llabor, l'Academia publicó nestos caberos años tanto les Normes Ortográfiques (primer edición, 1981), como la Gramática (primer edición, 1998) y el Diccionariu normativos (primer edición, 2000) y apurre agora la so versión electrónica en llinia.

La trescendencia d'estes obres va más allá de la so cenciella condición de productos culturales. Les obres citaes tienen, tamién, una perimportante ya innegable trescendencia xurídica. Estes obres publíquense como consecuencia de los referíos mandatos estatutarios y son actos xurídicos producíos nel exerciciu la función materialmente alministrativo propio de l'Academia, con calter anovativu: son quién pa camudar una situación xurídica y de fecho anterior al so exerciciu, tanto na fastera fáctica como xurídica. L'asoleyamientu de les obres referíes nel exerciciu les potestaes que-y encamienta l'Executivu a l'ALLA nos sos Estatutos regula y determina cuáles son les regles o normes a les que se tien d'axustar l'usu formal -oral y escritu- de la llingua asturiana. L'Academia non sólo describe la llingua, sinón que la normativiza, ordénándola y sistematizándola, xenerando asina un estándar normativu que define cuál tien de ser l'usu correchu oficial de la mesma.

Con independencia l'altu valir científicu (llingüísticu) que se-yos reconoz a estes obres, dende una perspeutiva xurídica, los citaos actos son declaración formal de la conocencia y la voluntá materialmente alministrativa de la Institución de la qu'emanen (ALLA); una declaración que tien envís normativu y que s'empobina con calter xeneral a una pluralidá indeterminada de destinatarios: los falantes d'asturianu.

> Normes Ortográfiques, Gramática y Diccionariu normativos de la llingua asturiana (ALLA).
> Más información: "L'Academia de la Llingua Asturiana: naturaleza xurídica y potestá alministrativa" (Xosé Lluis del Río).


Arriba     Atrás    PDF

Aconceyamientu de Xuristes pol Asturianu