Decretu 38/2002 de 4 d'abril, pol que se regula la Xunta Asesora de Toponimia del Principáu d'Asturies

Atrás    PDF    (ES)


BOPA Nu (...). (...)

La Llei 1/1998, de 23 de marzu, d’usu y promoción del bable/asturianu, contempla, nel so artículu 16, la Xunta de Toponimia del Principáu d’Asturies como muérganu consultivu y asesor de l’Alministración del Principáu, y correspuénde-y, ente otres funciones, el dictame previu a la determinación de los topónimos de la Comunidá Autónoma pol Conseyu de Gobiernu.

En desenrollu de les previsiones de la mentada Llei, el Decretu 62/1998, de 29 d’ochobre, reguló la Xunta de Toponimia, la so organización, funciones y réxime de funcionamientu, per aciu d’un Plenu y una Comisión Permanente, que la esperiencia demostró poco operativa pola mor, principalmente, del gran númberu de vocales que formen el Plenu.

Por tolo dicho, abulta aconseyable una configuración nueva de la Xunta de Toponimia, fecha a les nueves realidaes nes que tien d’actuar y dándo-y más axilidá na emisión de los sos dictames.

Al mesmu tiempu, amestase al so nome’l términu “Asesora”, col propósitu de destacar el so calter consultivu y asesor. Too ello vien a configurar un muérganu colexáu nuevu que sustituye, simplificándolu y dándo-y más axilidá, al inmediatu anterior creáu por Decretu 62/1998.

Na so virtú, y a propuesta del Conseyeru d’Educación y Cultura, en cumplimientu de lo dispuesto nos artículos 15.2 y 16 de la Llei 1/98, de 23 de marzu, y col acuerdu previu del Conseyu de Gobiernu, na so xunta de 4 d’abril de 2002.

DISPONGO

Artículu 1.- Oxetu.

La Xunta Asesora de Toponimia del Principáu d’Asturies ye un muérganu consultivu y asesor de l’Alministración del Principáu d’Asturies pal cumplimientu de les xeres que tien encomendaes d’investigación y normalización de los topónimos asturianos.

Artículu 2.- Composición.

La Xunta Asesora de Toponimia va tener la composición que sigue:

Presidencia: El titular de la Dirección Xeneral competente en materia cultural.

Vicepresidencia: El titular de la Dirección Xeneral competente en materia d’ordenación del territoriu.

Vocales:

Desendolcará la Secretaría de la Xunta Asesora’l titular del Serviciu que tenga encomendaes les funciones de promoción y enseñu del bable/asturianu, que va actuar con voz pero ensin votu.

Toos estos cargos van tener calter honoróficu y el so desenrollu nun va llevar arreyada nenguna retribución.

Arriendes d’ello, la Presidencia podrá facilitar la participación nes sesiones de la Xunta d’un máximu de dos persones especializaes en dalgún de los temes o cuestiones oxetu d’estudiu, que dirán con voz pero ensin votu.

Artículu 3.- Funciones.

Les funciones de la Xunta Asesora de Toponimia son les que siguen:

a) Emitir dictame previu a los alcuerdos del Conseyu de Gobiernu del Principáu d’Asturies pol que se determinen los topónimos.

b) Emitir informe, a petición del titular de la Conseyería d’Educación y Cultura, tocante a tolos asuntos que tengan rellación cola toponimia d’Asturies.

c) Emitir informe en solicitándolo, per aciu del titular de la Conseyería d’Educación y Cultura, otros muérganos de l’Alministración del Principáu d’Asturies, asina como los Conceyos y entes o muérganos públicos de la Comunidá Autónoma, tocante a tolos asuntos que tengan rellación cola toponimia d’Asturies.

d) Proponer al titular de la Conseyería d’Educación y Cultura qu’adopte toles midíes que considere oportunes pa la investigación y recuperación de los topónimos asturianos.

Artículu 4.- Réxime de sesiones.

La Xunta Asesora de Toponimia va axuntase toles veces que la convoque la Presidencia y, en tou casu, polo menos tres veces al añu.

Disposición adicional

En tolo que nun tea previsto nel presente Decretu rexirá lo establecío nel capítulu II del títulu II de la Llei 30/92, de 26 de payares, de Réxime Xurídicu de les Alministraciones Públiques y del Procedimientu Alministrativu Común, al respeutive de los muérganos colexaos.

Disposición derogatoria

Queda derogáu’l Decretu 62/98, de 29 d’ochobre, pol que se regula la Xunta de Toponimia del Principáu d’Asturies, y toles disposiciones de rangu igual o inferior que s’opongan a lo dispuesto nesti Decretu.

Disposiciones finales

1. La Xunta Asesora de Toponimia del Principáu d’Asturies tien de constituyise nun plazu d’un mes a cuntar dende la entrada en vigor d’esti Decretu.

2. Autorízase al titular de la Conseyería d’Educación y Cultura pa que dicte les disposiciones que seyan necesaries pa la execución de lo dispuesto nesti Decretu.

3. El presente Decretu va entrar en vigor el día siguiente al del so espublizamientu nel BOLETÍN OFICIAL del Principáu d’Asturies.

Dao n’Uviéu, a 4 d’abril de dos mil dos.

El Presidente del Principáu, Vicente Álvarez Areces.

El Conseyeru d’Educación y Cultura, Javier Fernández Vallina.


Arriba     Atrás    PDF    (ES)

Aconceyamientu de Xuristes pol Asturianu