Conceutos del Drechu Foral Asturianu (IV)

Alberto Arévalo (Bertu)
En: soc.culture.asturies
Data: 08/04/1999

Atrás     PDF


9) LA ANTOXANA

Como’l so nome indica, CONSISTE EN LA UTILIZACION D'UN ESPACIU DE CAMIN PUBLICU ALLUGAU DELANTRE O NOS ALRODIOS DE LA CASA, APROVECHANDOLO EN PARTE PAL ESTRAU DE COTOLLES O PRODUCTU DE LA COLLECHA Y FELECHOS; PA QUE, NUN PROCESU NATURAL DE DESCOMPOSICION ORGANICA, SE FORME’L CUCHU. La otra parte d’esti espaciu destinase a apilar lleña, cuchu, xuncir animales de tiru, llancar arboles o parres. Anguaño usase tamien p’estacionar’l tractor, materiales y preseos del llabor.

Ye esta una mena de SERVIDUME INNOMINADA, na que’l prediu sirviente ye un espaciu publicu y el prediu dominante, el conxuntu de la Caseria.

Esta institucion tien el puxu y entidá suficiente pa ser compilada, pues, magüer que tantu la lleña como’l cuchu tan quedando en desusu, l’espaciu en cuestion siempre será de gran aprovechamientu y utilidá pal serviciu de la Caseria.

10) EL DRECHU DE POZNERA

CONSISTE NA FACULTÁ QUE TIENEN LOS LLARIEGOS D’UNA ALDEGA O PARROQUIA PA LLANCAR, POSEER Y APROVECHAR ARBOLES DE TARREN COMUN, AINDA CUANDO TEA SEMAU DE CEREALES.

Vien a contituyir esta institucion lo qu’anguaño son los nuesos SOTOS DE CASTAÑALES, nos que cada propietariu marca coles sos propies señales –qu’acostumen a ser cruces y rayes amestaes- los arboles que llanca. Nun tien de tresmanase esta modalidá con aquella otra nomada "COMUNIDÁ PRIVADA D’ARBOLIU", na que los arboles nun se marquen porque toos y caun de los miembros de la comunidá tienen participaciones en toos y caun de los arboles. Esta institucion del Drechu de Poznera, ye cuasi dafechu propia d’Asturies y Galicia, y la so importancia na economia de la Caseria, nun ofrez llugar a dubies, lo que pasa ye que’l rendimientu entama a sacase dempues de pasaos dellos llustros. Ye bono tamien pal espoxigue de la fauna de nos, ya qu’arrondaes a estos arboles -castañales, nozales, carbayos, zrezales, carrascales- viven especies d’animales xabaces autoctonos interdependientes. Otra de les ventayes nel llancao d’arboliu ye qu’estos arboles xorrecen a mamplen en llugares que nun son de porgüeyu pa otres plantaciones, nin esfrute debio a lo pindio del tarren. Por too ello, nun solo tien de compilase la institucion, sinon que pagaria la pena el que la nuesa Alministracion Autonomica diese-y puxu al so xorrecimientu mediante campañes como la que nel so dia fizo la Generalitat de Catalunya.

11) LA PRESURA Y L’ESCALIU

Son 2 fases d’una mesma institucion que tuvo abondu puxu nel pasau. Pero qu’anguaño puen considerase esañiciaes. CONSISTIA NA OCUPACION Y POSTERIOR APROPIACION DE TARRENOS COMUNES. D’esta manera, lo que primero yeren simples montes comunes pasaron a ser senares, pa dempues camudar en "barbechos", cotos o villares, u la dixebracion y axudicancia de cuadrielles coyó calter definitivu y permanente. Güei danse dellos casos esceicionales y peraisllaos de cuadrielles de tarren comun que pasen a propiedá privada individualizada. Nun ye procedente nin tendria xustificacion que se recoyera y compilara esta institucion tresnochada, o meyor dicho, muerta. Per otru llau, daria ocasion a cometer abusos de los mas fuertes sobre los mas debiles apropiandose d’un padrimoniu que siempre fora colleutivu –les comunidaes vecinales-. Tien pues valor hestorico y testimonial, d’una epoca u esti Drechu ayudaba a esparder la colonizacion d’un campesinau escoso de tierres propies.

12) ARRENDAMIENTU D’HERBES

Neto a lo qu’ocurre colos montes vecinales en mancomun, l’arrendamientu d’herbes vieno coyendo n’Asturies a cada vegada mayor importancia y entidá. Los paisanos, cuando abandonen les propiedaes de so pa dir a vivir a la ciudá, peta-yos mas arrendar les herbes de les sos finques abandonaes, qu’arrendales pa que seyan cultivaes. La razon tá en que, a parte de que los tarrenos aselen de l’aicion de los fertilizantes quimicos, puen -llegao el casu- facilmente mazcarar el contratu arrendaticiu por un de simple compraventa de carros d’herba seco.

Convendria tamien qu’esta institucion se compilase, dau’l puxu que garró nos 5 ultimos llustros. Nun hai aldega na que nun haya della finca o Caseria rentada pa yerbes.

Y INDA PENDIENTE:

13). OTRES INSTITUCIONES QU’INDA CALTIENENSE
III-. INSTITUCIONES COMPILAES
IV-. PERSPEUTIVES DE FUTURU DEL DRECHU CONSUETUDINARIU ASTURIANU
V-. REFERENCIA A LES INSTITUCIONES DE DRECHU PUBLICU CONSUETUDINARIU ASTURIANU MAS IMPORTANTES
VI.- BIBLIOGRAFIA


Arriba    Atrás    PDF    Siguiente

Aconceyamientu de Xuristes pol Asturianu